Михаил Бабич Ватанны саклаучыларны һөнәри бәйрәмнәре белән котлады

Россия Президентының Идел буе федераль округындагы Вәкаләтле вәкиле Ватанны саклау традицияләренең буыннан-буынга күчүен билгеләп үтте.

(Казан, 22 февраль, «Татар-информ»). Традицияләрнең буыннан-буынга күчүе һәм Россия тарихын хөрмәт итү Ватан сакчыларының төрле буыннары өчен мөһим үзенчәлек булып тора. Россия Президентының Идел буе федераль округындагы Вәкаләтле вәкиле Михаил Бабич шул хакта хәбәр итте.

Ул искәртеп үткәнчә, кулларына корал тотып илне саклаган кешеләр Россия тарихында җәмгыятебездә дан һәм хөрмәт казанды.

«Аларның кылган батырлыклары тарих дәреслекләренә язылган, шәһәр мәйданнары һәм урамнары аларның исемен йөртә, фамилияләре мәңгелеккә Россия Армиясе частьләре һәм берләшмәләренең шәхси составы исемлегенә кертелгән», - дип белдерде Михаил Бабич.

Ул ветераннарга һәм Ватанны саклаучыларга ныклы сәламәтлек, тынычлык, иминлек һәм зур уңышлар теләде.