Прокуратура ярдәмендә пандемия чорында эшләгән табибларга 13 миллион сум акча түләнде

Күзәтү ведомствосына 460тан артык медицина хезмәткәре ярдәм сорап мөрәҗәгать иткән.

(Казан, 22 гыйнвар, «Татар-информ», Гүзәл Хөсәенова). ТР Прокуратурасы пандемия чорында эшләгән табибларга 13 миллион сум акча түләттерүгә иреште.

Татарстан прокуроры Илдус Нәфыйков күзәтү ведомствосының йомгаклау коллегиясендә шулай дип белдерде.

Күзәтү ведомствосы җитәкчесе хәбәр иткәнчә, пандемия вакытында 460тан артык медицина хезмәткәре үзләренә тиешле өстәмә акча алуда ярдәм сорап мөрәҗәгать иткән. Барлык мөрәҗәгатьләр дә прокуратураның кайнар элемтәсенә килгән.

«Республика прокурорлары шул исәптән медицина хезмәткәрләренең дә хезмәткә булган һәм социаль хокукларын яклауга сизелерлек өлеш кертте», - дип хәбәр итте Нәфыйков.

«Татар-информ» агентлыгы узган елда Татарстан прокуратурасының хезмәт хакы буенча ярты миллиард сумлык бурычны түләттерүгә ирешүе хакында хәбәр иткән иде.