Татарстанда туып үскән Камил Кашев Башкортстан прокуроры итеп билгеләнгән

Республиканың яңа прокуроры кандидатурасын бүген Корылтайның профиль комитеты утырышында раслаганнар.

(Казан, 21 март, «Татар-информ»). Генераль прокуратураның дәүләт гаепләүчеләре идарәсенең элеккеге башлыгы, Татарстанда туып үскән Камил Кашев Башкортстан прокуроры итеп билгеләнгән. Бу хакта ТАСС агентлыгы хәбәр итә.

Республиканың яңа прокуроры кандидатурасын бүген Корылтайның профиль комитеты утырышында раслаганнар. Депутатларның күпчелеге Камил Кашев кандидатурасын яклап тавыш биргән.

Камил Кашев 1973 елда Татарстанда туган. Казан дәүләт университетын тәмамлаган. Прокуратура органнарындагы хезмәт юлын 1995 елда бер районның прокуроры ярдәмчесе вазифасында башлаган. 2013 елдан РФ Генераль прокуратурасының Баш җинаять-суд идарәсе башлыгы урынбасары булып эшләгән.