Әлки районы Яңа Үргәагар авылында сайлауга килгән математика укытучысын котлаганнар

Хәзерге вакытка участокта 85 процент сайлаучы тавыш биргән.

(Казан, 19 сентябрь, «Татар-информ», «Әлки хәбәрләре», Лия Мардегалләмова). Бүген Әлки районы Яңа Үргәагар авылында сайлауга килгән математика укытучысы Рамилә Җәләлованы туган көне белән котлаганнар. Бу хакта район басмасы хәбәр итә.

Хезмәт ветераны Рамилә апа 4 дистә елга якын гомерен балаларга математика фәнен укытуга биргән. Тәҗрибәле, тирән белемле, актив укытучыны Нәби Дәүли исемен йөрткән гимназия коллективы, балалар, ата-аналар бик хөрмәт итә. 750нче участокта Рамилә Җәләлованы чәчәкләр, бүләкләр белән котладылар.

«Күбебез Рамилә апа укучылары бит. Без аны яратабыз, хөрмәт итәбез. Ул безне төгәллеккә өйрәтте. Ә безнең эштә ул бик мөхим», — ди участок рәисе Энҗе Фәттахова.

Тулаем алганда, 750нче сайлау участогында тавыш бирү бәйрәм рухында бара. Гармунчы Әсфән Сибәгатуллин килгән халыкны җыр-моң белән каршв ала. Мәдәният хезмәткәрләре ачык йөз, тәмле коймаклар белән сыйлап озатып кала.

Хәзерге вакытка участокта 85 процент сайлаучы тавыш биргән.