Гаиләне аз керемле дип тану тәртибе вакытлыча үзгәрде

Яңа закон 2020 елның 31 декабренә кадәр гамәлдә булачак.

(Казан, 19 апрель, «Татар-информ»). Дәүләт Думасы депутатлары гаиләне аз керемле дип тану тәртибен вакытлыча үзгәрттеләр. Пособие өчен мөрәҗәгать итү вакытына эшсез булган гражданның алдагы керемен исәпкә алмаска мөмкинлек бирә торган законны икенче һәм өченче укылышта кабул итте. Бу хакта «Интерфакс» хәбәр итте.

Хәзер гаиләне аз керемле дип тану өчен, әлеге ярдәмне алуга мөрәҗәгать итү көненә гаиләнең уртача кереме исәпләнелә. Социаль ярдәмнең төгәл төренә карап, пособие 3 айдан 12 айга кадәр түләнәчәк.

Эшсез гражданнарның узган чорда алынган керемнәре исәпкә алынмый.

Закон кабул ителү социаль ярдәмне адреслы күрсәтүгә ярдәм итәчәк. Ул 2020 елның 31 декабренә кадәр гамәлдә булачак.