Әсгать Сәфәров Нурлатта гражданнарны кабул итте

Эчке эшләр министрына шәхси сораулар белән 10 граждан мөрәҗәгать итте
(Казан, 17 июнь, “Татар–информ”). Кичә ТР буенча эчке эшләр министры Әсгать Сәфәров Татарстанның Спас, Әлки, Азнакай һәм Лениногорски районнарында эш сәфәре белән булды. Министр Нурлатта гражданнарны кабул итте, дип хәбәр итә ТР буенча Эчке эшләр министрлыгының матбугат хезмәте.
Эчке эшләр министрына шәхси сораулар белән 10 граждан мөрәҗәгать итте. Гаризаларның бер өлеше алдан язылу барышында каралды. Министр милиция эшенә, җинаятьчелеккә каршы көрәшкә кагылышлы сораулар белән мөрәҗәгать иткән Нурлат һәм Аксубай районнарында яшәүче 6 кеше белән очрашты. Мөрәҗәгатьләр арасында шулай ук торак, пенсия һәм башка проблемаларга кагылышлылары да бар иде. Гражданнарның бер генә мөрәҗәгате дә игътибарсыз калмады.
ТР буенча Эчке эшләр министрлыгы җитәкчелегенең халык белән очрашулары инде күп еллар үткәрелеп килә һәм алар күркәм традициягә әверелде. Кешеләр белән турыдан–туры аралашу урыннарда булган проблемаларны аңларга, гражданнарның милициягә реаль мөнәсәбәтен бәяләргә, борчыган мәсьәләләрне хәл итүдә кулдан килгәнчә ярдәм күрсәтергә мөмкинлек бирә.
Гражданнарны кабул иткәннән соң Әсгать Сәфәров Нурлат шәһәре һәм районы эчке эшләр бүлегенең җитәкчеләре белән оператив киңәшмә үткәрде.