Әлмәттә урам этләренә чип куя башладылар

Изоляциядән соң этләргә авырулардан вакцина ясала һәм паразитларга каршы эшкәртү эшләре үткәрелә.

(Әлмәт, 17 май, «Татар-информ», «Әлмәт таңнары»). Әлмәттә урамда йөрүче этләргә чип куя башладылар. Моның белән «БиО» оешмасы шөгыльләнә. Март башыннан әлеге оешма тарафыннан иллегә якын эткә чип куелган. Бу турыда район басмасы хәбәр итә.

Оешма җитәкчесе Рамил Ибраһимов процедураларның ничек узуы турында сөйләде. Иң элек «Халык контроле» яки торак сәясәте һәм ТКХ департаментына хуҗасыз хайваннар турында шикаятьләр килә. Гаризада этләрне кайда күрүләре турында да булырга тиеш.

Алга таба мөрәҗәгатьләр эшкәртелә һәм заказ формалаша. Бригада тарафыннан барлык мәгълүматлар, шул исәптән җенес һәм төс үзенчәлекләрен күрсәтеп, махсус журналда теркәлә.

Рамил Ибраһимов сүзләренчә, этләрне тоткач, махсус автомобильдә котыру авыруын булдырмау өчен аларны приютка карантинга илтәләр.

Изоляциядән соң этләргә авырулардан вакцина ясала һәм паразитларга каршы эшкәртү эшләре үткәрелә. Тагын ике атна дәвамында алар ветеринар күзәтүе астында була. Соңгы тикшерүдән соң этләр стерилләштерелә һәм аларга бирка куела. Җайланма сәламәтлекләренә куркыныч тудырмый.

Барлык тиешле процедуралар үткәрелгәннән соң, эт агрессив түгел икән, аны чыгаралар. Әгәр дә хайванның үз-үзен тотышында тотрыксызлык сизелсә, ул приютта яшәргә кала.