Буа районының Яңа Чәчкап авылында «Сугыш урлаган балачак» исемле кичә үтте
Очрашуга авыл мәктәбе укучылары да килде.
(Казан, 17 февраль, «Татар-информ», «Байрак»). Буа районының Яңа Чәчкап авылы мәдәният йортында «Сугыш урлаган балачак» исемле кичә үтте. Анда тыл ветераннары, фронтовик уллары, хезмәт ветераннары катнашты. Алар белән очрашуга авыл мәктәбе укучылары да килделәр. Бу хакта район газетасы яза.
89 яшьлек Сәфәргали 1941 елны кырларда арыш уңуын, аны авылда хатын-кызлар, картлар, бала-чагалар белән бергә жыелып суктыруларын сөйләде. Суккан икмәкне сыер жигеп, Буага ашлык кабул итү пунктына илтүләре хакында искә төшерде.
Гаделҗан Низамов әтисенең Сталинград сугышында югалуын, алты баланың бик авырлыкта әтисез үсүләре хакында хатирә яңартты. Гомумән, кичәгә килгән һәр бабайның әйтер сүзләре бар иде бу көнне.