Мәскәүдә янгын сүндерүчеләр өчен “акыллы” беләзекләрне сыныйлар

Алар янгын сүндерүчеләрнең операция вакытында кайда булуларын күзәтә ала.

(Казан, 16 октябрь, "Татар-информ"). Мәскәүдә янгын сүндерүчеләр өчен “акыллы” беләзекләрне сыныйлар. Алар янгын сүндерүчеләрнең сәламәтлеген, операция вакытында кайда булуларын күзәтә ала. Бу хакта НСН җиткерә, дип яза “Известия”.

“Беләзектә GPS/ГЛОНАСС-приемник урнаштырылган. Әгәр дә беләзекле хезмәткәр 30 секунд кымшанмыйча торса, куркынычсызлык мобиль постына кисәтү хәбәре килә. Моннан тыш, хезмәткәр үзе дә кисәтү хәбәрен җибәрә ала – аны постта да, хезмәттәшләре дә ишетәчәк”, - диелгән хәбәрдә.

Беләзек 30 градус салкыннан 55 градус җылылыкка кадәр куркынычсызлык мобиль постыннан 50 чакрым арада эшли ала.

Беренче булып беләзекләрне Зеленоградта 213нче янгын сүндерү-коткару хезмәткәрләре сыный башлаган.