Кабан күле буена ТАССР оешу тарихына багышланган лекция тыңларга чакыралар

Казанлылар алдында тарихчы Айрат Фәйзрахманов чыгыш ясаячак.

(Казан, 14 август, «Татар-информ»). Бүген, 14 августта, Кабан күле буенда «ТАССР ничек барлыкка килгән» дигән лекция оештырыла. Кабан күле буеның Instagram-аккаунтында шул хакта хәбәр ителә.

Казанлылар алдында тарихчы Айрат Фәйзрахманов чыгыш ясаячак. Ул нинди тарихи вакыйгалар һәм шәхесләрнең ТАССР төзелү турында Декрет кабул итәргә этәргеч бирүе хакында сөйләячәк. Башкалада яшәүчеләр Кабан күле буендагы территориянең шул көннәрдәге вакыйгалар белән ничек бәйләнгәнлеге хакында беләчәк.

Лекция кичке 7дә планлаштырылган. Очрашу урыны — Камал театрыннан күл буена илтә торган баскыч.

«Җылырак киенегез. Һава торышы начарайган очракта чара башка вакытка күчерелергә мөмкин, лекция башланганчы @kabanlake аккаунтын тикшерегез», — диелә вакыйганың анонсында.