15 июльдә ТР Дәүләт Советы карамагындагы Иҗтимагый яшьләр палатасы утырыш уздыра

Яшь парламентарийлар ТРда яшьләр арасында формаль булмаган субкультуралар эшчәнлегенә кагылышлы мәсьәләне дә караячак

(Казан, 14 июль, “Татар-информ”). 15 июльдә ТР Дәүләт Советы карамагындагы Иҗтимагый яшьләр палатасы утырыш уздыра. Көн тәртибенә 7 мәсьәлә чыгарылган.

Аерым алганда, яшь парламентарийлар ТР Иҗтимагый яшьләр палатасы составына үзгәрешләр кертүгә, 2010 елда Республика дәүләт яшьләр сәясәте өлкәсендә социаль яктан әһәмиятле проектлар һәм программалар бәйгесе нәтиҗәләрен чыгаруга, ТРда яшьләр арасында формаль булмаган субкультуралар эшчәнлегенә кагылышлы мәсьәләләрне караячак.

Алар шулай ук Татарстан парламентының 8 июльдә узган утырышында беренче укылышта кабул ителгән “Татарстан Республикасында балаларның сәламәтлегенә, аларның физик, интеллектуаль, психик, рухи һәм әхлакый үсешенә зыян китерүне кисәтү чаралары турында” закон проекты турында фикер алышачак.

Утырышта ТР Иҗтимагый яшьләр палатасының 2009 елдагы эшчәнлегенә – тулысынча, 2010 елга өлешчә йомгак ясау көтелә. Бу хакта ТР Дәүләт Советы матбугат хезмәте хәбәр итә.