Тәтеш районында берьюлы өч мөһим объект файдалануга тапшырылды

Объектлар Яңа ел алдыннан ачылды.

(Тәтеш, 14 гыйнвар, «Татар-информ», «Тәтеш таңнары»). Яңа ел алдыннан Тәтеш районының Олы Шә­мәк­ авылында модульле табиб амбулаториясе, Зеленовкада — юл, Бессоновода ФАП ачылды. Бу турыда район басмасы хәбәр итә.

Тәтеш районы башлыгы Рәмис Сафиуллов һәм «Татарстан Муниципаль берәмлекләр советы» Ассоциациясе рәисе Әгъзам Гобәйдуллин объектларны тантаналы ачу чараларында ­катнашты.

Олы Шәмәк авылында узган елны республика программасы буенча төзелгән модульле табиб амбулаториясе Тәтеш районының якын-тирәдәге 9 торак пунктында яшәүче 1700дән күбрәк кешегә хезмәт күрсәтәчәк. Элек медицина учреждениесе авыл читендә урнашкан булган, бу өлкәннәр­гә уңайсызлыклар тудырган. Яңа амбулатория Олы Шәмәк үзәгендә урнашкан», — диде район башлыгы Рәмис Сафиуллов. 

Әгъзам Гобәйдуллин әй­тү­енчә, Тәтеш районында соңгы 6 елда яңа объектлар тапшыру матур гадәткә керде. Бердәнбер модульле амбулаториянең тиз арада төзелүе бик сөендерә. «Барлык объектлар мөһим, шулай да медицина объектлары — аеруча да», — диде ул. 

Зеленовкада яшәүче­ләрдә үткән ел шатлыклы вакыйга — рес­публика программасы буенча төзелгән, күптән көтелгән машина юлын файдалануга тапшыру белән хәтерләрендә ­уелып калачак. 

Бессоново авылында республика программасы буенча төзелгән модульле фельдшер-акушерлык пункты ачылды. «Бу авылга ФАП кирәк иде. Планда — кибет тө­зү», — диде район башлыгы Рәмис Сафиуллов.

«Респуб­лика программаларының гамәлдә булуы беренче чиратта кешеләр тормышының сыйфатын яхшыртуга юнәл­телгән», — диде «Татарстан Республикасы муниципаль берәм­лекләр Советы» Ассоциациясе рәисе Әгъзам Гобәйдуллин.