Дәүләт Советына Казан тирәсендә «яшел пояс» булдыру турындагы тәкъдим кертеләчәк
Татарстан башкаласы тирәсендә урман-парк поясының мәйданы 3,3 мең га тәшкил итәчәк.
(Лаеш районы, 13 декабрь, «Татар-информ», Диана Авакян). Казан тирәсендә 3,3 мең гектар мәйданда урман-парк яшеллеге поясы булдыру турындагы материаллар Татарстан Дәүләт Советы президиумына кертеләчәк. Мондый карарны Дәүләт Советының Экология, табигатьтән файдалану, агросәнәгать һәм азык-төлек сәясәте комитеты әгъзалары кабул итте.
«Аннары бу карар буенча Казан чикләрендә төгәл участокларны билгеләү буенча техник эш башкарылачак. Бу мәйданнарда башкарма комитет һәм башка субъектлар ягыннан барлык хуҗалык эшчәнлеге туктатыла», — дип аңлатты комитет рәисе Азат Хамаев.
Ел саен Татарстан башкаласында кимендә 30 мең агач һәм куак утырталар. Шәһәрнең яшел фондының гомуми мәйданы 16 процент тәшкил итә, диелгән комитет утырышына әзерләнгән материалларда.
2016 елда Россия Президенты Владимир Путин илнең эре шәһәрләре тирәсендә агачларны кисүне чикләү турындагы федераль законга имза куйган иде.