Төркиядә коронавирус йоктыруның икенче очрагы теркәлгән

Бөтендөнья сәламәтлек саклау оешмасы мәгълүматларыннан күренгәнчә, 100дән артык илдә 120 меңнән артык кеше коронавирус йоктырган, күбесе терелеп аякка баскан, 4 меңнән артыгы якты дөнья белән хушлашкан.

(Казан, 13 март, «Татар-информ»). Төркия сәламәтлек саклау министры Фәхреттин Коджа илдә коронавирус йоктыруның икенче очрагы теркәлүе хакында белдерде. Бу хакта РИА Новости агентлыгы хәбәр итә.

Коронавирус эләктергән беренче кеше – Европада сәфәр кылып кайткан ир-ат. Хәзер аның гаиләсе - карантинда.

«Кичә тест үткәрелде һәм шигебез расланды. Бездә әлеге авыруны йоктырган тагын бер кеше бар, ул коронавирусны беренче булып эләктергән ир-ат даирәсеннән. Без вирусның таралышын шушы чикләрдән чыгармас өчен тиешле чаралар күрә башладык», - дип язган Коджа Twitter социаль челтәрендә.