Мэрия фаҗига аркасында балаларга урамга чыгарга тыела дигән хәбәрне кире какты

Шәһәр хакимиятендә социаль челтәрләрдә тарала торган мәгълүматның фейк булуын искәрттеләр.

(Казан, 11 май, «Татар-информ»). Социаль челтәрләрдә һәм мессенджерларда 14 майга кадәр балаларга урамга чыгарга тыела дигән хәбәр чынбарлыкка туры килми. Бу хакта Татарстан башкаласы мэриясенең матбугат хезмәтендә хәбәр иттеләр.

«<...> челтәрләрдә тарала торган мәгълүмат фейк < ... >» — дип искәрттеләр шәһәр хакимиятендә.

«Хәзерге вакытта уку йортларын саклау көчәйтелде. Һәр мәктәп янында постлар куелды. Бу хәзерге вакытта мәктәптә нәрсә дә булса бара дигән сүз түгел. Алар куркынычсызлыкны тәэмин итү өчен куелды», - диделәр мэриядә.

Элегрәк билгесез кешеләр 11 майдан 14 майга кадәр «бик кирәк булмаганда балаларның урамга чыгуын чикләргә» дигән үтенечне тараткан һәм «Көньяк» («Южный») һәм KazanMall сәүдә үзәкләренә керү юлы ябылу турында хәбәр иткән иде.

Булган мәгълүматларга караганда, Казанның 175нче гимназиясендә ату вакытында сигез кеше һәлак булган, 21 кеше хастаханәгә салынган.