Казанда бер ай эчендә эшсезләрнең саны дүрт тапкырга арткан

Эшсезләрнең күбесе Совет, Яңа Савин һәм Идел буе районнарында теркәлгән.

(Казан, 11 май, «Татар-информ», Әдилә Зиатдинова). Казанда барлыгы 16 меңнән артык шәһәр кешесе эшсез утыра, соңгы айда аларның саны дүрт тапкырга арткан. Бу хакта коронавирус инфекциясе таралуга каршы тору буенча шәһәр штабы утырышында Казан мэры Илсур Метшин һәм Кадрлар сәясәте идарәсе башлыгы Гөлнара Мусина хәбәр итте.

«Әлеге күрсәткеч борчуга салды. Әле бу башы гына, һәм, үз-үзеңне изоляцияләү чорын узып, безгә чираттагы тапкыр икътисади кризис нәтиҗәләре белән көрәшергә туры киләчәк», — диде Татарстан башкаласы мэры.

Кадрлар сәясәте идарәсе башлыгы Гөлнара Мусина Казанда 1 марттан 13 меңнән артык кеше эшсез булып саналганлыгын билгеләп үтте. «Аларның бары тик 37 проценты гына карар нормасына эләгә, аларга 12 мең 130 сум күләмендә пособие каралган. Моңа 2020 елның 1 мартыннан эштән куылган һәм „эшсез“ статусын алган гражданнар, хезмәт дисциплинасын бозган өчен эштән мәхрүм булганнардан тыш кешеләр һ.б. керә», — ди ул.

«11 майга Казан халкының мәшгульлек үзәкләрендә эшсез булып 16 мең 140 кеше теркәлгән. Аларның күбесе Совет, Яңа Савин һәм Идел буе районнарыннан», — диде ул.