Казанда Ретт синдромы буенча Дөнья конгрессында меңгә якын кеше катнашачак

Алар арасында фундаменталь фән белән шөгыльләнүче 100 кеше, 400 табиб-клиницист һәм 200гә якын консультация алырга теләүче гаилә бар

 (Казан, 11 май, «Татар-информ», Надежда Гордеева). Казанда 13-17 майда Ретт синдромы буенча VIII Дөнья конгрессында меңгә якын кеше катнашачак. Бу хакта бүген "Татар-информ" агентлыгында бу чарага багышланган матбугат конференциясендә Казан дәүләт медицина университеты ректоры Алексей Созинов хәбәр итте.

Спикер сүзләренчә, меңләгән катнашучы арасыннан 100 кеше фундаменталь фән белән шөгыльләнә, 400 табиб-клиницист Ретт синдромлы пациентларны контрольда тота һәм 200гә якын гаилә бу авыру буенча консультация алырга тели. Безгә бөтен Россиядән генә түгел, ә чит илләрдән дә киләчәкләр. Без дөнья җәмгыятенең Ретт синдромы буенча сигезенче конгрессны үткәрү өчен нәкъ менә Казанны сайлавы белән горурланабыз", -диде ул.

КДМУ ректоры фикеренчә, мондый конгрессларның үзенчәлеге программаның төрлелегендә, ул фундаменталь фән белән бәйле лекцияләрдән, фикер алышулардан, пациентларның ата-аналары өчен "түгәрәк өстәл"ләрдән торачак.

Үз чиратында хезмәт, халыкны эш белән тәэмин итү һәм социаль яклау министры урынбасары Ирина Просвирякова журналистларга, Татарстанның социаль яклау системасында 13 балалар тернәкләндерү үзәге һәм өлкәннәр өчен алты үзәк бар, дип сөйләде. "Әлегә бу юнәлештә зур тәҗриҗбә тупладык дип әйтә алмыйбыз. Шуңа күрә без Ретт синдромы буенча конгрессны безнең белгечләр өчен сирәк генетик авырулы балаларны карау һәм тернәкләндерү буенча яңа фәнни белем алу мөмкинлеге буларак кабул итәбез", - дип билгеләп үтте.

Ретт синдромы ассоциациясе идарәсе рәисе Ольга Тимуца белдергәнчә, оешмада Россиянең 52 төбәгеннән 185 гаилә теркәлгән. "Алар өчен мондый бала белән ничек яшәргә кирәклеге турында мәгълүмат алу мөһим, чөнки бүгенгә дару юк. Безнең максат - беренче чиратта, мондый балалардан баш тартуны бетерү", - дип ассызыклады ул.

Табиб, профессор, Көнбатыш Австралиядә Telethon Балалар институтының баш фәнни хезмәткәре Хелен Леонард бу юнәлештә алып барыла торган эшләр турында сөйләде. Аерым алганда, ул Австралиядә Ретта синдромлы балалар турында мәгълүмат базасын булдырган. Хәзер базада 400дән артык пациент турында мәгълүмат бар. "Мәгълүмат базасы ярдәмендә гаиләләргә бу авыруны җиңәргә ярдәм итә алдык", - диде ул.