Дәүләт архивы Идел Буе федераль округында сакланучы документлар буенча 6нчы урында тора

2018 елда муниципаль архивлар беренче тапкыр 865 аеруча кыйммәтле документны күрсәтте.

(Казан, 11 март, “Татар-информ”, Динә Йосыпова). Татарстан муниципаль архивларында сакланучы документлар күләме буенча республика Идел Буе федераль округында алтынчы урында, туплау чыганаклары исемлеге саны буенча – икенче урында, штат саны буенча – тугызынчы урында тора.

Бүген бу хакта Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты утырышында Татарстанның архив эше буенча дәүләт комитеты рәисе Гөлнара Габдрахманова хәбәр итте.

“Муниципаль архивлар өлешенә республика архивларында сакланучы документларның гомуми күләменнән 32 проценты туры килә. 45 муниципаль архивта республика милкенә караган 314 меңнән артык эш саклана. “Архив эше үсеше” дәүләт программасы кысаларында республикада бердәм архив мәгълүмат системасы булдырылды. Барлык муниципаль архивлар да шуңа тоташкан”, - диде Гөлнара Габдрахманова.

Узган ел муниципаль архивлар беренче тапкыр аеруча кыйммәтле документларны белдерде. Барлыгы 865 эш башкарылган. Цифрлау буенча зур эш үткәрелгән – муниципаль архивлар 23 меңнән артык скан-лист булдырган.

“Узган ел ТР Дәүләт архивы хезмәткәрләренең уртача айлык хезмәт хакы, бюджеттан тыш керемнәрне исәпкә алып, 29,7 меңнән артык сум, хезмәт күрсәтүче персоналның – 18,8 меңнән артык сум тәшкил итте”, - диде Гөлнара Габдрахманова.