Баулыда үрнәк гаиләне зурладылар

Гаилә, мәхәббәт һәм тугрылык көнендә Баулыда яшәүче Вәлитовлар гаиләсен зурладылар, аларга «Мәхәббәт һәм тугрылык өчен» медален тапшырдылар.

(Казан, 9 июль, «Татар-информ», «Баулы-информ», Ләйсән Галиева). Гаилә, мәхәббәт һәм тугрылык көнендә Баулыда яшәүче Ирек һәм Рәмзия Вәлитовлар гаиләсенә «Мәхәббәт һәм тугрылык өчен» медален тапшырдылар. Бу хакта район газетасы яза.

Тантаналы чара барышында ЗАГС хезмәткәре Гаилә, мәхәббәт һәм тугрылык көне тарихы белән таныштырды. Бу бәйрәм 2008 елдан бирле билгеләп үтелә, аның символы — ромашка чәчәге. 2009 елдан алып бугенге көнгә кадәр Баулы районында 15 гаиләгә «Мәхәббәт һәм тугрылык өчен» медале тапшырылган.

Ирек һәм Рәмзия апа Вәлитовлар 46 ел бергә гомер иткәннәр, ике бала — кыз һәм ул тәрбияләп үстергәннәр. Бүгенге көндә алар өч оныкларына сөенеп яшиләр. Балалары да әти-әниләренә рәхмәт сүзләрен җиткерделәр, диелә хәбәрдә.