«Үлемсез полк» акциясен социаль челтәрләрдә, онлайн-кинотеатрларда карап була

Акция мондый форматта икенче тапкыр уздырыла.

(Казан, 9 май, «Татар-информ», Эльза Кузнецова). Бүген 15:00 сәгатьтә Татарстан башкаласында «Үлемсез полк онлайн» бөтенроссия акциясе башланды. Трансляцияне «Татар-информ» сайтында карарга була.

Акция мондый форматта икенче тапкыр уздырыла. Һәрбер төбәкнең үз трансляциясе булачак.

Трансляцияне 2021.polkrf.ru сайтында, шулай ук социаль челтәрләрдә һәм телеканалларның битендә, шулай ук Okko, ivi.ru, more.tv онлайн-кинотеатрларында һәм Смотрим.ру. платформасында карарга була.

Моңа кадәр «Үлемсез полк онлайн» акциясенә Татарстан Республикасының Дәүләт киңәшчесе, Россиянең Хезмәт Герое Минтимер Шәймиев кушылган иде. Ул онлайн-йөрештә әтисе Шаһишәрип Шәймиевнең сурәтен урнаштырды.

Шулай ук онлайн-йөрештә Татарстан Президенты Рөстәм Миңнеханов та катнаша. Ул бабасы Галимҗан Миңнехановның сурәтен урнаштырды һәм республика халкын әлеге акциядә катнашырга өндәде.

«Үлемсез полк» акциясе гадәти форматта 24 июньдә була.