Айдар Метшин Дан аллеясендә туганнар каберенә чәчәкләр салды

Тантаналы маршны Гани Сафиуллин исемендәге кадетлар корпусы курсантлары төгәлләде.

(Казан, 9 май, «Татар-информ»). Бүген Түбән Кама муниципаль районы башлыгы Айдар Метшин Дан аллеясендә туганнар каберенә чәчәкләр салды.

Тантанада Түбән Кама муниципаль районы Башкарма комитетының структур бүлекчәләре, сәнәгать предприятиеләре җитәкчеләре, ветераннар, Җиңү волонтерлары катнашты. Бу турыда Түбән Кама муниципаль районы рәсми сайтында хәбәр ителә.

Исегезгә төшерик, 2020 елның 31 гыйнварында шәһәр зиратының Дан аллеясендә туганнар каберлегендә 80нче чаңгы батальонының 19 сугышчысы кайтарып җирләнде.

Бүген Түбән Кама халкы Бөек Ватан сугышы геройларына баш ияргә килде. Тантананы Айдар Метшин ачып җибәрде, ветераннар белән бергә ул һәйкәлгә чәчәкләр салды. Аңа «Түбән Кама Нефтехим» ГАҖ, «ТАИФ-НК» АҖ, «Танеко», «Татнефть-Нефтехим» ИК коллективлары кушылды.

Тантаналы маршны Гани Сафиуллин исемендәге кадетлар корпусы курсантлары төгәлләде.

«Барыгызны да Бөек Җиңү бәйрәме белән котлыйм, — дип мөрәҗәгать итте Айдар Метшин чарада катнашучыларга. — Барыгызга да зур рәхмәт, сәламәтлек, тынычлык телим».