Җиңү бәйрәме хөрмәтенә Казанда Ми-8 вертолетлары очып узды

Өч вертолетка Россия, Татарстан флаглары, Җиңү Байрагы тагылган иде.

(Казан, 9 май, «Татар-информ», Гөлнар Гарифуллина). Казанда Җиңү паркы өстеннән 9 Май- Җиңү бәйрәме хөрмәтенә Россия, Татарстан флаглары, Җиңү Байрагы белән Ми-8 вертолетлары очып узды. 

Трансляцияне алып баручылар һавада Казан вертолет заводы, Росгвардия идарәсе һәм Татарстан буенча Гадәттән тыш хәлләр министрлыгының кушма очучылар отрядының Ми-8 легендар машиналары очканын әйттеләр.

Вертолетларның берсен Казан вертолет заводы экипажы йөртте. Экипаж командиры — «Батырлык өчен» медале белән бүләкләнгән өлкән очучы-сынаучы Владислав Перепелкин. Икенче очучы — II класслы очучы-сынаучы Роман Удовиченко.

Бүген, шулай ук, Казансу өстеннән Ту-160 бомбардировщигы очып үтәчәк.