Әлки районында төлкеләргә 20 мең вакциналы конфет таратылачак

Ел башыннан бирле шундый вакцина-конфетлар ике тапкыр – барысы 22 мең данә таратылган булган инде.

(Әлки, 8 ноябрь, "Татар-информ", "Әлки хәбәрләре"). Әлки районында төлкеләргә 20 мең вакциналы конфет таратылачак, дип яза җирле басма.

Төлкеләргә котыру чиренә каршы профилактика үткәрү өчен район ветеринария берләшмәсенә 20 мең данә вакцина кайткан.

Конфетка охшаган әлеге “тәмле дару” төлкеләр күп йөри торган урыннарга таратылачак. Бу эшне башкаруда ветеринария хезмәткәрләренә аучылар, егерьләр ярдәм итә.

Ел башыннан бирле шундый вакцина-конфетлар ике тапкыр – барысы 22 мең данә таратылган булган инде. Вакцина төлкеләр сәламәтлегенә зыян салмый, аларны котыру чире йоктырудан гына саклый. Быел төлкеләрнең нык үрчүе күзәтелә. Алар, йорт кошларына хыянәт итү белән бергә, котыру чире тарату чыганагы булып та торалар.

Ветеринария хезмәткәрләре шулай ук йорт хайваннарына котыру чиренә каршы прививка-уколлар ясый башлаганнар.