Баулы районының ике авылында фельдшер-акушерлык пунктында капиталь ремонт булачак

Бинаның берсе 50 процентка таушалган, икенчесендә җылылык системасы эшләми.

(Баулы, 8 март, «Татар-информ», «Баулы-информ», Ләйсән Галимова). 2021 елда Баулының Бакалы һәм Ваешур авылларында фельдшер-акушерлык пунктлары капиталь ремонтланачак.

Покров-Урыстамак авыл җирлеге башкарма комитеты мәгълүматы буенча, Бакалыдагы ФАП бинасы 2004 елда төзелгән. Бина 50 процентка таушалган. Бу фельдшер-акушерлык пунктында Рәмилә Фомина эшли. Ул Бакалы һәм Кит-Озеро авылларында яшәүче барлыгы 128 кешегә хезмәт күрсәтә.

Ваешур авылында фельдшер-акушерлык пунктында Нина Пронина эшли. Ул Шарай, Ваешур һәм Покровский бистәсендә яшәүче 126 кешегә хезмәт күрсәтә. Шунысын да билгеләп үтәргә кирәк, ФАП бинасы шактый таушалган һәм хәзерге вакытта җылылык системасы эшләми.