Татарстанда җәй айларында туристлар агымы 43 процентка диярлек кимегән

Туристларның республикага карата кызыксынуы кимүенә яңа төрдәге Covid-19 коронавирус пандемиясе йогынты ясаган.

(Казан, 7 сентябрь, «Татар-информ»). Татарстанда җәй айларында туристлар агымы 42,5 процентка диярлек кимегән. ТР Туризм буенча дәүләт комитетының матбугат хезмәте шул хакта хәбәр итә.

«2020 елның июнь-август айларында туристлар агымы 2019 елның шул чоры белән чагыштырганда 42,5 процентка азайды», - дип искәрттеләр ведомствода.

Шул ук вакытта, быелның августында республиканың туристлык үзәкләрендә ял итүчеләр июнь аена караганда дүрт тапкырга диярлек күбрәк булган.

Казан Кремле белән 750 мең кеше танышкан, бу узган елгы күрсәткечнең 59,8 проценты дигән сүз. Болгарда – 107 мең (34,2 процент), Зөядә – 258 мең (76,6 процент), Чистайда — 11 мең (44,2 процент), Алабугада 92 мең (48,9 процент) турист булып киткән.