Казанда изоляция чорында пенсия һәм пособиеләрне өйләргә китереп бирәчәкләр

Коронавирус таралудан саклану максатында, почта бүлекләренә бару киңәш ителми.

Скопировать ссылку

(Казан, 6 апрель, «Татар-информ», Гөлнар Гарифуллина). Казанда пенсия һәм пособиеләрне моңарчы почта бүлекләренә килеп алучыларга изоляция чорында өйләренә китереп бирәчәкләр. Бу хакта Казан мэриясендә коронавирусны кисәтү буенча шәһәр штабы утырышында башкарма комитет җитәкчесенең транспорт, икътисади үсеш һәм сәүдә мәсәләләре буенча урынбасары Илдар Шакиров әйтте.

Ул «Россия почтасы» клиентларының 8 проценты пенсия алырга почта бүлекләренә килеп йөргәннәрен искәртте. «Изоляция шартларында хат ташучылар пенсия һәм пособиеләрне өйләргә китереп бирәчәкләр. Бик кирәк булмаса, почта бүлекләренә бармый торуыгызны сорыйбыз», — диде.

Ул шәһәрдә штатлы режимда 88 почта бүлеге эшләгәнен билгеләп узды.

Илдар Шакиров, шулай ук пенсия акчасы банк картасына күчерелү очрагына да тукталды. Kzn.ru сайтында графиклар һәм планнар бүлегендә банк бүлекләренең эш режимы күрсәтелгәнен әйтте.

Казан мэры Илсур Метшин пенсионерларга борчылмаска киңәш итте. «Пенсия китереләчәк, тыныч кына өйдә көтегез. Беркем пенсиясез калмаячак», — диде.

#Коронавирус буенча карантин

Сәхифәләр

Казанда изоляция чорында пенсия һәм пособиеләрне өйләргә китереп бирәчәкләр