Түбән Кама кызы Бөтендөнья парамузыкаль фестивалендә Татарстан данын яклаячак

15 яшьлек кыз республика, бөтенроссия һәм дөньякүләм конкурсларда күп җиңүләр яулаган.

(Казан, 5 октябрь, "Татар-информ"). Түбән Кама кызы Бөтендөнья парамузыкаль фестивалендә Татарстан данын яклаячак. Унбиш яшьлек Мәликә биш ел ишарәләп җырлау белән шөгыльләнә һәм бөтен дөньяны яуларга хыяллана. Бу турыда Түбән Кама муниципаль районы рәсми сайтында хәбәр ителә.

Түбән Кама кызы әзерли торган номерда иң мөһиме - куллар. Нәкъ менә алар җырдагы хис-тойгылар һәм аның мәгънәсен ачып бирә.

Кызга 4 яшендә йөрәгенә операция ясаганнан соң, ул ишетү сәләтен югалта, ләкин бу аңа иҗат итәргә комачауламый.

Мәликә музыканы вибрация аша (тире аша) кабул итә һәм хисләрен тамашачыга җиткерә. 15 яшьлек кыз республика, бөтенроссия һәм дөньякүләм конкурсларда күп җиңүләр яулаган. Хәзер яшь артистка дәрәҗәле парамузыкаль фестивальгә әзерләнә.

Бөтендөнья парамузыкаль фестивале октябрь ахырында Мәскәүдә узачак.