Имтиханга бәйле борчулар белән психологка мөрәҗәгать итүче балалар саны арткан

Кирәк булган очракта, укучылар өчен махсус тренинглар да оештыралар.

(Казан, 4 декабрь, «Татар-информ», Гадел Әхмәтҗанов). Татарстанда имтиханнарга бәйле борчулар белән психологка мөрәҗәгать итүче мәктәп укучылары саны арткан. Бу турыда «Татар-информ» агентлыгына интервьюда Республика балалар клиник хастаханәсе психологы Лия Бодрова сөйләде.

«Безгә мөрәҗәгать итүчеләрнең 40 процентын нәкъ менә имтиханнар белән бәйле сораулар борчый. Укучылар үзләренең хис-тойгылары белән уртаклаша. Балаларга укытучылар да, әти-әниләр дә басым ясый. Шуңа күрә бала яңа мәгълүматны авыр кабул итә», — диде ул.

Лия Бодрова укучылар өчен тренинглар үткәрүләре турында да әйтте.

«Укучылар шундый сораулар белән язга таба күбрәк мөрәҗәгать итә. Кайчакта алар өчен тренинглар да үткәрәбез», — дип сөйләде психолог.