Төркиянең Тышкы эшләр министры Россия халкының кайгысын уртаклашты

Красноярск өлкәсендә вертолет һәлакәткә очрау сәбәпле, 18 кеше вафат булды.

(Казан, 4 август, “Татар-информ”). Төркиянең Тышкы эшләр министры Мевлют Чавушоглу Россия халкының һәм Красноярск өлкәсендә вертолет һәлакәтендә һәлак булучыларның туганнарының кайгысын уртаклашты.

“Россиянең Красноярск өлкәсендә вертолет һәлакәткә очрап, 18 кешенең үлеме турында хәбәр ишетеп кайгырдым. Хөкүмәткә, Россия халкына һәм һәлак булучыларның туганнарына кайгы уртаклашу сүзләремне җиткерәм”, дип рус телендә язган Чавушоглу Twitter битендә.

Красноярск өлкәсендә вертолет һәлакәткә очрап, 18 кеше үлде, дип хәбәр итте бүген Россиянең Гадәттән тыш хәлләр министрлыгы. Фаҗига 4 август көнне 10:20 сәгатьтә (Мәскәү вакыты белән 06:20 дә) Турухан районында, Игарка торак пунктыннан ике километр ераклыкта булган, дип яза "Анадолу" мәгълүмат агентлыгы.