Айрат Шәфигуллин Халыкара инвалидлар көне уңаеннан татарстанлыларга мөрәҗәгать итте

ТРда 2 ел “Уңай мохит” программасын эшләве нәтиҗәсендә сәламәтлек саклау, социаль яклау өлкәсенең 230 дан артык объекты уңайлаштырылган

  (Казан, 3 декабрь, «Татар-информ»). Бүген - Халыкара инвалидлар көне. Шул уңайдан ТР хезмәт, мәшгульлек һәм социаль яклау министры Айрат Шәфигуллин татарстанлыларга мөрәҗәгать итте.
“20 елдан артык без традиция буенча 3 декабрьдә Халыкара инвалидлар көнен билгеләп узабыз. Бу көн кеше хокукларын тулысынча һәм тигез дәрәҗәдә үтәү һәм инвалидларның җәмәгатьчелек тормышында катнаштыру, физик мөмкинлелкәре чикләнгән кешеләрнең проблемаларына игътибар юнәлтү, аларның хокукларын һәм иминлекләрен саклау максатыннан билгеләп үтелә.
Татарстан Республиксында 32 меңнән артык инвалид яши, аларның 14 меңе инвалид балалар. Физик мөмкинлелкәре чикләнгән кешеләрнең тормыш сыйфатын яхшырту өчен барысы да эшләнелә. Татарстанда гамәлгә куела торган социаль сәясәтнең өстенлекле юнәлешләренең берсе инвалидларның проблемаларын хәл итүдә ярдәм итү тора, аларга социаль ярдәм чаралары, медицина һәм реабилитация хезмәте, торак белән тәэмин итү, шулай ук реабилитациянең техник чаралары һәм шифаханәдә дәвалау мөмкинлекләре булдыру тора.
Физик мөмкинлекләре чикләнгән кешеләрне эшкә урнаштыру мәсьәләсе дә аерым урын алып тора. Агымдагы елда халык мәшгульлеге хезмәтенә мөрәҗәгать иткән 2 мең инвалид эш урыннары тапкан. Алар махсус эш урыннары һәм махсус программалар булдыру буенча өстәмә чаралар кысаларында да эшкә урнаштырыла.
Инвалидларның республиканың иҗтимагый-сәяси, социаль–икътисади һәм мәдәни тормышында һәрьяклап һәм нәтиҗәле катнашуы ныклы шартларның берсе булып тора. Татарстан Республикасы бу проблеманы тирәнтен аңлавы нәтиҗәсендә “Уңай мохит” федераль программасын гамәлгә кую буенча өч сынау мәйданчыкларының берсе булды. Бүген Татарстанда физик мөмкинлекләре чикләнгән кешеләр өчен уңай яшәү шартлары актив булдырыла дип әйтергә мөмкин. ТР да 2 ел дәвамында “Уңай мохит” программасы эшләве нәтиҗәсендә сәламәтлек саклау, социаль яклау, халык мәшгульлеге, мәгариф, мәдәният һәм спортның 230 дан артык объекты адаптацияләнгән.
Без изгелек декадасында гына кайгырту, аңлау, инвалидлар тормышы белән кызыксыну белән чикләнергә тиеш түгел. Республикада яшәүчеләрне янәшәбездә яшәүче физик мөмкинлекләре чикләнгән кешеләргә игътибарлы булырга чакырам. Без аларга ярдәм кулы сузарга бурычлы.
Бу истәлекле көндә чын күңелдән һәркемгә сәламәтлек, бәхет һәм мәхәббәт, күңел тынычлыгы, иминлек телим!”, - диелгән мөрәҗәгатьтә.