Казахстанда латин хәрефләре белән беренче газетаны нәшер иткәннәр

Редакциядә беренче битне латин хәрефләре белән чыгарырга булганнар.

(Казан, 3 ноябрь, «Татар-информ»). Казахстанда латин шрифты белән беренче газетаны нәшер иткәннәр, дип хәбәр итә “Казинформ”.

«Аркалык хабары» газетасы Костанай өлкәсенең Аркалык шәһәрендә чыккан.

“Казахстан Президенты казах теленең латин графикасына күчүе турында Указ имзалагач, редакциядә беренче полосаны латин алфавиты хәрефләре белән чыгарырга булганнар”, - диде газетаның баш мөхәррире Кайрат Есмагамбетов.

Аның сүзләренчә, бу гамәлнең максаты – яңа графиканың ни дәрәҗәдә уңайлы булуы турында укучы фикерен белү.

“Латин алфавиты хәрефләренең ничек булуы, кәгазьдә ничек күренүе кызык иде. Техник яктан кыенлыклар булмады, чөнки интернетта кириллицадагы әзер текстны берничә секундта  латин графикасына үзгәртү өчен махсус конвертерлар бар”, - диде газетаның баш мөхәррире.

Латин алфавитына күчү катлаулы булмаячак, дип саный Есмагамбетов, һәм алар беренчеләрдән булып латин графикасын куллана башлаячак.