Авыр патологияле Татарстан балаларын Лондонга дәвалауга җибәрү буенча сөйләшүләр бара

Бу хакта бүген Министрлар Кабинетында узган брифингта сәламәтлек саклау министры урынбасары Руфинә Голубева сөйләде
(Казан, 3 июнь, “Татар-информ”, Айгөл Фәхретдинова). ТР Сәламәтлек саклау министрлыгы бүгенге көндә авыр патологияле балаларны Лондонга дәвалауга җибәрү өчен җирле табиблар белән сөйләшүләр алып бара. Бу хакта бүген Министрлар Кабинетында узган брифингта сәламәтлек саклау министры урынбасары Руфинә Голубева сөйләде.

30 майда Казанга Лондон клиникаларының берсеннән авыр патологияле балаларга консультация үткәрү өчен табиблар килгән иде. 31 май көнне алар Республика клиник балалар хастаханәсендә Татарстанның төрле шәһәр -районнарыннан җыелган 18 яшькәчә булган 71 балага консультация үткәргән. ТР Сәламәтлек саклау министрлыгы мондый тикшерүләрне Лондон табиблары белән киләчәктә дә дәвам итү, балаларны дәвалау, реабилитацияләү, белгечләрне укыту буенча да килешүгә ирешкән. Алай гына да түгел, хәзер Лондон хастаханәсенә дәвалауга җибәрү өчен ике яшь пациент сайлана.