Тимер юлчылар травматизмны кисәтү, хезмәтне саклауны камилләштерү юллары хакында сөйләшә

4-6 июнь көннәрендә Казанда йөк һәм пассажирлар ташу хуҗалыгында хезмәтне саклауга багышланган киңәшмә узачак
(Казан, 3 июнь, «Татар-информ»). 4-6 июнь көннәрендә Казанда йөк һәм пассажирлар ташу хуҗалыгында хезмәтне саклауга багышланган чара узачак. Горький тимер юлы Казан бүлегенең матбугат хезмәтеннән хәбәр итүләренчә, «Россия тимер юллары» компаниясенә караган тимер юл җитәкчеләре Татарстан башкаласында 3 көн дәвамында травматизмны кисәтү, хезмәтне саклауның алдынгы технологияләре, профилактика чараларына контрольне камилләштерү юллары хакында фикерләшергә җыена.
Киңәшмәдә катнашучылар Казан бүлегендә эшләүчеләр өчен тудырылган хезмәт шартлары белән якыннан танышачак, Юдино станциясендә булачак.
Агымдагы елның беренче 4 ае эчендә Горький тимер юлы Казан бүлегендә хезмәтне саклау чараларына 14 157,5 сум финанслар тотылган. 2007 ел нәтиҗәләренә килгәндә, узган ел Казан бүлегендә травматизмны киметү һәм хезмәткәрләрне хәвефле зонадан чыгаруга 17 млн. 858 мең сум акча тотылган. Бу максатларга киткән чыгымнар, 2006 ел белән чагыштырганда, 23 процентка арткан. Ә эшчеләрнең хезмәт шартларын яхшырту өчен 16 млн. 842 мең сум сарыф ителгән.