Беренче кварталда татарстанлылар табибка электрон система буенча 1,2 млн тапкыр язылган

Бу хакта ТР Мәгълүматлаштыру һәм элемтә министрлыгы белдерә

  (Казан, 3 апрель, «Татар-информ»). Агымдагы елның I кварталында Татарстанда яшәүчеләр “Табибка язылу” электрон хезмәтеннән 1,2 миллионнан артык тапкыр файдаланган. Бу хакта ТР Мәгълүматлаштыру һәм элемтә министрлыгы матбугат хезмәте белдерә.

Республика медицина оешмаларына табибка ТР дәүләт һәм муниципаль хезмәтләр порталы, “Электрон Татарстан” инфоматы, электрон чират терминалы, мобиль кушымта аша, шулай ук кабат килү өчен табибның автоматлаштырылган эш урыны аша язылырга мөмкин.

Искәртеп узабыз: ТР медицина оешмаларына теркәлгән булган очракта гына табибка бу юл белән язылу мөмкин, бу шарт стоматология поликлиникаларына кагылмый.