Әлмәттә җәмәгать эшләрендә актив катнашучылар җыелды

Бүгенге көндә Әлмәт муниципаль районында 48 меңнән артык пенсионер яши.

(Әлмәт, 2 октябрь, "Татар-информ", "Әлмәт таңнары"). Бу көннәрдә Әлмәтнең политехникум ашханәсендә Өлкәннәр көне уңаеннан зур бәйрәм чарасы узды. Бирегә район үсешенә лаеклы өлеш кертүчеләр, әле дә җәмәгать эшләрендә актив катнашучылар җыелды. Бу турыда район басмасы хәбәр итә.

Өлкәннәрне район башлыгы Тимур Нагуманов, “Татнефть" компаниясенең профсоюз комитеты рәисе Гомәр Яруллин һәм районның ветераннар советы рәисе Василий Самойлов котлады.

 Алар абый-апаларга күпьеллык хезмәтләре, шәһәребез һәм Татарстан Республикасы үсешенә зур өлеш кертүләре, актив тормыш позициясе өчен ихлас рәхмәт сүзләрен җиткерде.

 Бүгенге көндә Әлмәт муниципаль районында 48 меңнән артык пенсионер яши. Шуларның 850 се 90 яшькә җиткән, 6 кеше йөз яшьтән дә өлкән. Алар арасында 55 сугыш ветераны, 1364 тән артык тыл хезмәтчәне исәпләнә.