Казан студентлары реклама бирүчеләр өчен рекомендацияләр эшләде

Тикшеренү барышында сораштырылганнарның чиреге рекламага бөтенләй битараф булган
(Казан, 2 июнь, “Татар-информ”. Ирина Халитова). Туполев исемендәге КДТУда, сәнәгый коммерция һәм маркетинг кафедрасында “Сатып алынасы әйбер турында карарга йогынты ясаучы рекламаның иң нәтиҗәле төрен ачыклау” темасына маркетинг тикшеренүләре нәтиҗәләре тәкъдир ителде.
Өченче курс студентлары Диләрә Миңнуллина, Аида Баһаутдинова һәм Юлия Калашникова фикеренчә, аларның тикшеренүләре темасының актуальлеге реклама нәтиҗәлелеген арттыру өчен дөрес методлар сайлаудан гыйбарәт. Үз эшендә алар рекламаны кешеләр аңы белән манипуляция ясау ысулы дигән карашны кире кагарга тырышты.
Тикшеренү барышында студентлар 1765 анкета эшкәрткән, анкета тутыруда 41 процент ирләр, 59 процент хатын-кызлар катнашкан, төп яшь төркеме (48 процент) – 18-24 яшь, респондентларның 36 проценты югары белем алган.
Сораштырылганнарның 75 проценты реклама йогынтысына бирелүчеләр булуы ачыкланган, 25 проценты үзләрен рекламага битараф саныйлар, аларның зур өлеше рекламага төшкән танылган кешеләргә тискәре карашта. Ташлама яки түбән бәя сораштырылганнарның 64 проценты өчен сатып алуга этәргеч фактор булып тора, ә 38 процентының реклама хәбәрләренең кабатлануына ачуы килә.
Алынган мәгълүматларны гомумиләштереп, булачак маркетологлар реклама бирүчеләр һәм тауар җитештерүчеләр өчен үз реконмендацияләр эшләгән һәм алар тәкъдир итүдә яңгырады. Аерым алганда, алар мәгълүматын җиткерү ысулларын, максатчан сегментны исәпкә алуны, шулай ук реклама бюджетын дөрес бүлүне аерып чыгарды.
Студентлар бу эшләрен икътисад фәннәре кандидаты, Туполев исемендәге КДТУ доценты Эльвира Жилкина җитәкчелегендә уздырды.