2017 елгы Чирмешән гүзәле ачыкланды

Бәйгенең шартлары буенча кызларның чибәрлеге генә түгел, сәләтләре исәпкә алынды.
(Казан, 1 сентябрь, «Татар-информ»). Республика көнендә Чирмешәндә «Чирмешән гүзәле-2017» бәйгесенең финалы узды. Анда барлыгы сигез кыз ярышты. Алар – 38 дәгъвачы арасыннан сайлап алынган җиңүчеләр, дип хәбәр итә «Вести КАМАЗа» сайты.
 
Бәйгенең шартлары буенча кызларның чибәрлеге генә түгел, башка сәләтләре – тапкырлык, музыка коралларында уйнау, вокал мөмкинлекләре, ашарга әзерли белү кебек факторлар исәпкә алынды.
 
Жюри әгъзалары бертавыштан Алсу Зиннурованы җиңүче дип тапты. Ул Казан (Идел буе) федераль университетында журналист белгечлеген үзләштерү белән беррәттән, «Татарстан – Яңа гасыр» телеканалында да эшли.
 
Алсу Чаллыда туган, хәзерге вакытта Нурлатта яши. Матурлык бәйгесендә ул Утыз Имән авыл җирлегеннән катнашты, Алсу анда әбисе янында еш кунак була икән.