Кабан күлендә аккош үлемен ачыклау өчен экспертиза үткәреләчәк

31 июль көнне Түбән Кабан күлендә кичке күңел ачу чаралары үткәрелмәде.

(Казан, 1 август, “Татар-информ”). Урта Кабан күлендә аккош үлеме сәбәпле Биочыганаклар буенча Татарстан дәүләт комитеты кошның үлем сәбәбен, җенесен, яшен ачыклау буенча экспертиза үткәрәчәк. Бу хакта Казанда Парк һәм скверлар дирекциясе Instagram битендә хәбәр бастырып чыгарган.

Хәбәрдә әйтелгәнчә, кичә кич Түбән Кабан күлендә музыка сүндерелгән, кичке күңел ачу чаралары үткәрелмәгән.

Һәлак булган аккош күптән түгел Урта Кабанда нәсел калдырган парның берсе булмаган. Парк һәм скверлар дирекциясе әлеге парның исән-сау булуын җиткерә.

Алдан “Татар-информ” кара аккош Зигфридны “Черек күл” паркыннан Кама Тамагына күчерәчәкләр дип хәбәр иткән иде.