Чистайда балалар һәм яшьләр иҗаты сарае яңартылды

Сарайда 1500 дән артык бала физкультура, спорт, техника, сәнгать, табигый-фәнни, социаль-педагогик, туристик юнәлеш буенча шөгельләнә.

(Казан, 23 февраль, "Татар-информ"). Татарстанда “Балаларга өстәмә белем бирү” өстенлекле проектын гамәлгә ашыру максатыннан, Чистай балалар һәм яшьләр иҗаты сараен капиталь ремонтлау өчен, республика бюджетыннан 47 млн сум бүленгән иде. Татарстан Республикасы Президенты Рөстәм Миңнеханов ярдәме белән Чистай балалар һәм яшьләр иҗаты сараенда балалар шөгыльләнү өчен, яхшы шартлар тудырылган. Бу турыда Татарстан Республикасы Мәгариф һәм фән министрлыгы матбугат хезмәте хәбәр итте.

Балаларга өстәмә белем бирү учреждениесе – кирпечтән төзелгән 3өч катлы бина. Аның мәйданы – 6179,8 кв.м. тәшкил итә. Бина 1986 елда төзелгән, ә капиталь ремонт 2017 елда тәмамланган. Сарайда 1500 дән артык бала физкультура, спорт, техника, сәнгать, табигый-фәнни, социаль-педагогик, туристик юнәлеш буенча шөгыльләнә, дип әйтелгән әлеге хәбәрдә.

Биредә 30 өстәмә белем бирү педагогы эшли. Алар системалы рәвештә квалификация күтәрү курсларын узалар, семинарларда, мастер-классларда, вебинарларда катнашалар. Педагоглар халыкара, бөтенроссия, республика күләмендә уздырылган һөнәри бәйгеләрдә катнашып, яхшы нәтиҗәләргә ирешәләр.