Быел чыгарылыш сыйныф укучыларының өлгерләренә медальләрнең алтыны гына биреләчәк

Медаль алучы укучылар БДИда 75 баллдан югарырак нәтиҗәләр күрсәтергә тиеш

 (Казан, 20 май, “Татар-информ”, Лилия Локманова). Быел мәктәпне тәмамлаучыларга көмеш медальләр каралмаган. Бу хакта ТР Министрлар Кабинетында узган брифингта  ТР мәгариф һәм фән министрының беренче урынбасары Данил Мостафин хәбәр итте.

“Чыгарылыш сыйныф укучыларына медальләр бирү мәсьәләсен һәр субъект үзе хәл итә. Шул нигездә, Татарстан мәктәпләрен тәмамлаучы укучыларга быел көмеш медаль бирелмәячәк. Чыгарылыш сыйныф укучысы тиешле нормаларны үтәп, БДИларны 75 баллга бирсә яки аннан да югарырак нәтиҗәләр күрсәтсә, ул укучыга алтын медаль тапшырылачак”, - диде ул брифингта.