Татарстан укытучылары хезмәт хакыннан тыш 30 мең сум алачак

Илкүләм олимпиада җиңүчесен әзерләгән мөгалимгә хезмәт хакына ай саен - 30 мең сум, олимпиада призеры өчен 20 мең сум өстәләчәк.

(Казан, 13 август, "Татар-информ"). Татарстанның Мөслим районында педагогларның август киңәшмәсе секция утырышлары дәвам итә.

Республиканың мәгариф һәм фән министры Энгель Фәттаховның илкүләм олимпиада җиңүчесен әзерләгән мөгалимнәр ай саен - өстәмә 30 мең сум, призер әзерләгән өчен 20 мең сум алачак, дигән хәбәре катнашучылар арасында күп фикерләр тудырды.

Элегрәк хәбәр ителгәнчә, Энгель Фәттахов 9 сыйныф укучыларының төп дәүләт имтиханын татар телендә бирергә чакырды. Ул бу турыда милли мәгариф мәсьәләләре секциясендә белдергән иде.