Татарстанның иң яхшы тәрбиячесе Бөгелмәдә яши

Людмила Барабошкина Мәскәүдә узачак бәйгедә республика данын яклаячак

(Казан, 10 апрель, «Татар-информ»). 8 апрель көнне Казанда "Ел тәрбиячесе-2015" республика конкурсының финалы тәмамланды. Бөгелмәнең 14нче прогимназиясендә хезмәт куючы Людмила Барабошкина "Татарстан Республикасының ел тәрбиячесе-2015" абруена лаек булды.

Искәртәбез: конкурсның зона турларында җиңгән 15 финалчы жюри хөкеменә үзләренең мастер-классларын тәкъдим итәргә тиеш иде. Людмила Барабошкина июньдә Мәскәүдә  узачак бәйгедә республика данын яклаячак.

2нче урынны Түбән Кама районыннан Марина Шарыгина яулады. Өченче урында - Казанның Идел буе районының 131нче балалар бакчасы тәрбиячесе Ксения Москолу.

Шулай ук берничә номинациядә җиңүчеләрнең дә исемнәре мәгълүм булды. 

Конкурста җиңүчеләрне һәм призерларны тантаналы рәвештә бүләкләү октябрь аенда Укытучылар көнен бәйрәм итү кысаларында узачак, дип хәбәр итә ТР Мәгариф һәм фән министрлыгы.