Иннополиста бөтенроссия робот техникасы олимпиадасы ачылды

Яңа шәһәргә Россия финалына РФ нең 45 төбәгеннән 700 катнашучы килде

 (Иннополис, 9 июнь, «Татар-информ», Надежда Гордеева). Бүген Иннополис шәһәрендә бөтенроссия робот техникасы олимпиадасының тантаналы ачылышы узды.

Яңа шәһәргә Россия финалына РФ нең 45 төбәгеннән 700 катнашучы килде. Алар үз субъектларында робот техникасы ярышларында финалга чыгучылар.

Ярыш нәтиҗәләре буенча, яшьләр агымдагы елның ноябрендә Доха (Катар) шәһәренә 12 нче бөтендөнья роботлар олимпиадасында үз илләре данын яклый ала.

Робот техникасы олимпиадасы ачылышы тантанасында РФ элемтә һәм массакүләм коммуникацияләр министры Николай Никифоров, ТР Премьер-министры Илдар Халиков, «Иннополис» университеты ректоры Александр Тормасов, World Robot Olympiad генераль секретаре Клаус Дитлев Кристинсен һ.б. катнашты.

Николай Никифоров сәламләү сүзендә укучыларга ярышларда уңышлар теләде һәм алар олимпиаданың төбәк этабын узгач, җиңүчеләр инде, дип билгеләп үтте.

«Робот техникасы – искиткеч шөгыль, математик, физик, программист та булырга, механиканы да белергә кирәк. Бу бик кызыклы шөгыль. Мин сезгә көнләшеп карыйм, чөнки кызыклы эштә үзегезне күрсәтү өчен фантастик мөмкинлекләр бар”, - дип мөрәҗәгать итте ул катнашучыларга, һәм бүген Иннополис шәһәренә нәкъ 3 ел, дип белдерде. “Бу сезнең өчен төзелгән Россиянең иң яңа шәһәре”, - дип билгеләп үтте министр.

Илдар Халиков та олимпиадада катнашучыларны сәламләде. “Бүген бу залга Россиянең иң алга киткән укучылары җыелды. Өлкәннәрнең 90 проценты сез ясаганны ясый алмый. Бу уникаль һәм фантастик. Моннан тыш, иртәгә бу залда Россия чемпионнары игълан ителәчәк. Бирегә ноябрьдә Катарда Россия укучылары иң акыллы булуын исбатлаучылар җыелды. Биредә робот техникасы буенча булачак дөнья чемпионнары бар, дип өметләнәм”, - дип ассызыклады ул.

Үз чиратында, Клаус Дитлев Кристинсен укучыларга җиңү теләде һәм чараны оештыручыларга рәхмәт белдерде. Ул, шулай ук, Катарда халыкара этапта Россия җыелма командасын көтәм, диде.

2014 елда «Иннополис» университеты Казанда узган бөтендөнья роботлар олимпиадасының Россия этабын оештырды. Университет 2018 елга кадәр робот техникасы буенча олимпиада үткәрү хокукын яулады.