Казанда рус теле буенча Халыкара олимпиада җиңүчеләрен бүләкләделәр

Бүләкләү чарасы Рус теле көнендә Универсиада авылында узды.

(Казан, 6 июнь, "Татар-информ", Наталья Рыбаова). Бүген, Рус теле көнендә, Казанның Универсиада авылында туган теле рус теле булмаган балалар арасында рус теле буенча Халыкара олимпиада җиңүчеләрен бүләкләделәр.

Олимпиада 2014 елдан башлап үткәрелә. Быел анда читтән торып Россиянең 21 төбәгеннән һәм Бәйсез Дәүләтләр Бердәмлеге илләреннән 3 меңнән артык бала катнашты. Аларның иң яхшы дип табылган 200дән артыгы финалга узды. Алар арасында Казахстан, Үзбәкстан, Киров, Түбән Новгород, Омск, Оренбург һәм Пенза өлкәләреннән, Пермь төбәгеннән, Башкортстан, Марий Эл, Саха (Якутия), Татарстан Республикасыннан һәм Россиянең башка төбәкләреннән катнашучылар бар иде. 

Укучыларда рус теле һәм әдәбиятына мәхәббәтне укытучылар тәрбияли. Бүген Татарстан мәктәпләрендә 3 меңнән артык рус теле һәм әдәбияты укытучылары эшли. Аларның 78 проценты беренче һәм югары категорияләргә ия. Рус теле көнендә аларның иң яхшыларын бүләкләделәр. Аларга, Мәгариф һәм фән минстрлыгының мактау грамоталарын "Мәгарифтәге казанышлары өчен" күкрәк билгесе тапшырдылар. 

"Туган теле рус теле булмаган балалар арасында  рус теленнән Халыкара олимпиада дүртенче ел үткәрелә. Татарстанда ике дәүләт теле – рус һәм татар телләре. Безнең төп максат – аларны үстерү. Мин балаларга олимпиадада актив катнашулары өчен рәхмәтле. Финалга илнең 18 төбәгеннән катнашучылар килде. Конкурс җиңүчеләрен котлыйм һәм алга таба да уңышлар телим", – диде вице-премьер, Татарстанның мәгариф һәм фән министры Энгель Фәттахов, олимпиада җиңүчеләренә мөрәҗәгать итеп. 

Татарстан күп телле республика. Монда 173 милләт вәкиле яши. Телләр белән мәдәниятларны саклау һәм үстерү – республика сәясәтенең мөһим юнәлеше.