8 июньдә чит телләрдән – Бердәм дәүләт һәм татар теленнән Бердәм республика имтиханы уза

Инглиз теленнән – 1660, немец теленнән – 96, француз теленнән – 48, татар теленнән 182 кеше сынау бирергә теләк белдергән
(Казан, 5 июнь, “Татар-информ”, Римма Гатина). Дүшәмбе – 8 июньдә республика мәктәпләрен тәмамлаучы 11 нче сыйныф укучылары чит (инглиз, немец һәм француз) телләрдән Бердәм дәүләт имтиханын һәм татар теленнән Бердәм республика имтиханын тапшыра.

Билгеле булганча, быел Татарстан мәктәпләрен 25688 укучы тәмамлый. Ә чит телләрдән имтиханны барлыгы 1804 укучы тапшырыр дип көтелә. Аерым алганда, инглиз теленнән – 1660, немец теленнән – 96, француз теленнән 48 кеше сынау бирергә теләк белдергән. Чит телләрдән имтиханнар 2 сәгать 40 минут (160 минут) дәвам итә. Татар теленнән Бердәм республика имтиханнарын тапшырырга 182 укучы теләк белдергән. Бу предметтан имтихан 3 сәгать дәвам итә.

Билгеле булганча, имтиханнарны, 11 нче сыйныфлардан тыш, узган елларда мәктәп тәмамлаучылар, башлангыч һәм махсус урта һөнәри уку йортлары укучылары, шулай ук урта (тулы) белемне чит илләрдәге белем бирү учреждениеләрендә алучылар да тапшыра. Шуңа күрә сынау бирүчеләрнең саны быел мәктәп тәмамлаучыларның исәбеннән артып китә.