Айрат Фəйзрахманов милли мәгарифне үстерү программасын тәкъдим итте

Бөтендөнья татар яшьләре форумы рәисе урынбасары телне үстерү буенча эшләргә кирәкле төп юнәлешләрне атады.

(Казан, 3 август, “Татар-информ”, Зилә Мөбәрәкшина). Бөтендөнья татар яшьләре форумы рәисе урынбасары Айрат Фәйзрахманов пленар утырышта милли мәгарифне үстерү программасын тәкъдим итте. Ул 8 пункттан тора.

1) "Сəлам" уку-укыту əсбапларын тарату һəм аны уку үзəклəрендə булдыру;
2) Татар теле буенча Сертификацион үзəклəр оештырыру;
3) ТРның һəр районында татар телендə эшлəүче мəктəплəрне булдыру;
4) РФ татарлар яши торган төбəклəрендə татар сыйныфларын булдырып, татар балаларын шунда укырга чакыру;
5) Татар теле буенча ата-аналар конференциясен уздыру;
6) ТР мөселманнарының татар телен үстерү шурасын булдыру;
7) Татар телле мəктəплəр өчен бердəм методик һəм БДИ системаларын булдыру;
8) Татар телен сайлаганнар өчен стипендиаль фонд булдыру.

 “Болар резолюциягə керəме-юкмы, билгесез. Əмма шул тəкъдимнəр буенча ике ел дəвамында алга таба эшлəячəкбез”, - диде Айрат Фәйзрахманов.

  • 1-5 август көннәрендә Казанда чираттагы VIII Бөтендөнья татар яшьләре форумы уза. Ул Бөтендөнья татар конгрессы Башкарма комитеты, Татар яшьләре форумы һәм ТРның Яшьләр эшләре һәм спорт министрлыгы тарафыннан оештырыла.