Рөстәм Миңнеханов төзүчеләрне һөнәри бәйрәмнәре белән котлады
Татарстан Президенты Рөстәм Миңнеханов төзүчеләрне һөнәри бәйрәмнәре белән тәбрик итте. Белгечләрнең хезмәте шәһәрләр һәм аларда яшәүчеләрнең тормышын яхшырак һәм уңайлырак итә, дип язган ул үзенең Telegram-каналында.
«Төзүчеләрне һөнәри бәйрәмнәре белән котлыйм! Бүген төзелеш сезонының кызган чагында меңләгән кеше шәһәрләребез яхшырак һәм уңайлырак булсын өчен объектларда эшли! Аларның барысына да рәхмәт!» - диелгән республика лидерының котлавында.
Котлау янына ул символик фото да урнаштырган: аның сул һәм уң ягында Татарстанның элеккеге төзелеш, архитектура һәм ТКХ министрлары – Ирек Фәйзуллин һәм Марат Хөснуллин. Хәзер Ирек Фәйзуллин – Россия Федерациясе төзелеш һәм торак-коммуналь хуҗалык министры. Марат Хөснуллин исә Россия Федерациясе вице-премьеры вазифасын били, шул исәптән торак һәм юл төзелеше мәсьәләләре, илкүләм проектларны гамәлгә ашыру белән дә шөгыльләнә.