Казан мәчетләре каршында янә ислам дине нигезләрен өйрәтү курслары ачыла

Октябрьдән май аена кадәр теләгән һәркем дога кылу серләренә төшенәчәк, гарәп грамматикасы һәм йолаларны үтәү буенча башлангыч күнекмәләр алачак
(Казан, 30 сентябрь, “Татар–информ”, Фәрит Шаһидуллин). Татарстан мәчетләрендә янә ислам дине нигезләрен өйрәтү курслары ачыла. Октябрьдән май аена кадәр теләгән һәркем дога кылу серләренә төшенәчәк, гарәп грамматикасы һәм йолаларны үтәү буенча башлангыч күнекмәләр алачак. Җәйге тәнәфес дача сезоны башлануга бәйле иде.
Мисал өчен, иртәгә Казанның Болгар мәчетендә булачак укучыларны үзләренең мөгаллимнәре белән таныштырачаклар. Элеккеге еллардан аермалы буларак, төркемнәрнең берсендә дәресләр рус телендә барачак. Бу шәһәрдә яшәүчеләр татар телен начар белү белән бәйле.
Укучыларның бер өлеше (нигездә, пенсионерлар) дәресләргә атна дәвамында йөриячәк. Эшләүче гражданнар дәресләргә шимбә һәм якшәмбе көннәрендә рәхим итә ала.