Түбән Камада балалар арасында Коръән бәйгесе узды

Бәйгедә барлыгы 104 бала катнашты — 63 малай Үзәк мәчеттә, 41 кыз «Ихлас» үзәгендә ярышты.

(Казан, 30 март, «Татар-информ»). Түбән Кама мөхтәсибәте 7-15 яшьлек балалар арасында Коръән бәйгесе үткәрде.

Туган телләр һәм халыклар бердәмлеге елына багышлап үткәрелгән чарада катнашучыларны нәзарәтнең шәригать мәсьәләләре буенча бүлекнең баш белгече, Коръән-хафиз Илнур хәзрәт Хәйруллин җитәкчелегендәге жюри бәяләде, дип хәбәр итә ТР Диния нәзарәтенең матбугат хезмәте.

Бәйгедә барлыгы 104 бала катнашты — 63 малай Үзәк мәчеттә, 41 кыз «Ихлас» үзәгендә ярышты.

Бәйгене ачып җибәреп, конкурсны оештыручы Хәлил хәзрәт Хәйбрахманов Түбән Кама мөхтәсибәтендә Коръәнне өйрәнү дәрәҗәсе үсүен билгеләп үтте. Ул Коръәнне ятлау өчен генә түгел, ә аның буенча яшәргә тырышу өчен дә өйрәнергә кирәклеген ассызыклады.

Аннары 3-7 яшьлек балалар Коръәннән үзләре теләгән сүрәне укып күрсәтте, 7-11 һәм 11-15 яшьлекләр ярты, бер, ике, өч җүзне яттан белү буенча ярышты. Ярыштан берәү дә бүләксез кайтып китмәде, һәр укучыга Коръән, кызыксындыру бүләге тапшырылды.