Татарстан мөфтие Мәскәүдә Әлбир хәзрәт Крганов белән очрашты

Җитәкчеләр Ислам үсешенең мөһим мәсьәләләре буенча Россия мөселманнары Дини җыены һәм Татарстан мөселманнары Диния нәзарәте белән хезмәттәшлек алып бару мәсьәләләре буенча фикер алыштылар.

(Казан, 29 апрель, «Татар-информ»). Мәскәүгә эш сәфәре барышында Татарстан мөфтие Россия дин эшлеклеләре белән очрашулар үткәрде. Шундый очрашуларның берсе Россия мөселманнары Дини җыены резиденциясендә Мәскәү һәм Чувашия мөфтие Әлбир хәзрәт Крганов белән үтте.

Мөфти Әлбир хәзрәт Крганов кунакны ихластан каршы алып, Камил хәзрәт Сәмигуллинны чираттагы дүрт елга Татарстан мөфтие итеп сайлануы белән тәбрикләде һәм өммәт үсешенә керткән өлешләрен югары бәяләп, Россия мөселманнары Дини җыены имамнары исеменнән тәбрикләү сүзләрен җиткерде.

Дустанә очрашу вакытында җитәкчеләр Ислам үсешенең мөһим мәсьәләләре буенча Россия мөселманнары Дини җыены һәм Татарстан мөселманнары Диния нәзарәте белән хезмәттәшлек алып бару мәсьәләләре буенча фикер алыштылар. Мөфтиләр Россия дин белемен ныгыту мөһимлегенә тукталдылар.

Камил хәзрәт мөфти Әлбир хәзрәткә ТР мөселманнары Диния нәзарәтенең киңкырлы эшчәнлеге, Татарстан Республикасында Рамазан аен үткәрү тәртибе, изге ай кысаларында социаль активлыкны гамәлгә ашыру, шул исәптән IX Республикакүләм ифтарны үткәрү турында сөйләде. Ул шулай ук аны әлеге зур авыз ачу мәҗлесенә чакырды.